Ўзбекистонда риэлторлик фаолияти қонун билан тартибга солинди
Янги тартибга кўра, риэлторлар махсус ўқитиш ва малака имтиҳонидан ўтиб, сертификат олиши, ташкилотлар эса Ягона реестрга киритилиши керак бўлади.
Ўзбекистонда риэлторлик фаолиятини тартибга солувчи янги қонун қабул қилинди. “Риэлторлик фаолияти тўғрисида”ги қонун 7 август куни имзоланган.
Ҳужжатга кўра, Давлат активларини бошқариш агентлиги риэлторлик соҳасидаги ваколатли давлат органи этиб белгиланди.
Риэлтор сифатида фаолият юритиш учун талабгор махсус ўқитиш дастуридан ўтиши ва малака имтиҳонини муваффақиятли топшириши керак. Шундан сўнг унга профессионал жамоат бирлашмаси томонидан штрих-кодли малака сертификати берилади.
Риэлтор риэлторлик ташкилоти таркибида фаолият юритади ва малака сертификатига эга бўлиши лозим. Риэлторлик ташкилоти ҳамда кўчмас мулк бўйича агент Ягона реестрга киритилган санадан бошлаб тегишли фаолиятни амалга ошириш ҳуқуқига эга бўлади.
Қонунда риэлторлик хизматларининг асосий турлари ҳам белгиланган. Улар қаторига кўчмас мулк ва унга бўлган ҳуқуқлар билан боғлиқ битимларни тузишда воситачилик қилиш, кўчмас мулк ва унга бўлган ҳуқуқлар савдосини ташкил этиш, кўчмас мулкни ишончли бошқариш, шунингдек, кўчмас мулк бозорида ахборот, маслаҳат ва реклама хизматларини кўрсатиш киради.
Шунингдек, хусусий сектор томонидан мултилистинг тизими ташкил этилиши назарда тутилган. Ушбу тизим риэлторлик хизматларини муддатли шартномалар асосида “ягона дарча” тамойили орқали кўрсатиш ва электрон шаклда ишончли ахборот алмашиш имконини беради.
