Хивада “Қовун сайли – 2026” халқаро фестивали бошланди

Хивада “Қовун сайли – 2026” халқаро фестивали кўтаринки кайфиятда бошланди. Қадимий Ичан қалъа ва замонавий “Арда Хива” мажмуасида ўтаётган фестиваль илк кунларданоқ қовунлар ифори, миллий анъаналар, мусиқа, гастрономия ва сайёҳлик муҳити билан шаҳарга ўзгача файз бағишлади.

 

 

Фестивалнинг илк кунида Хоразмнинг машҳур қовун навлари, маҳаллий маҳсулотлар ва агро-брендлар намойиш этилиб, меҳмонларга ҳудуднинг асрлик қовунчилик анъаналари яқиндан таништирилмоқда. Миллий таомлар, ҳунармандчилик намуналари, халқ ижоди ва театрлаштирилган чиқишлар эса байрам муҳитини янада бойитмоқда.

 

 

Қадимий шаҳар кўчаларида фольклор жамоалари чиқишлари, миллий куй-қўшиқлар ва рақслар янграб, фестивалга ташриф буюрган маҳаллий аҳоли ҳамда сайёҳларга Хоразм маданиятининг ўзига хос руҳини ҳис этиш имконини бермоқда.

 

 

Фестиваль дастурининг муҳим йўналишларидан бири гастрономия бўлиб, меҳмонларга Хоразм ошхонасининг анъанавий таомлари ҳамда қовундан тайёрланган турли маҳсулотлар тақдим этилмоқда. Қовун кўргазмаси ва ярмаркаси эса сайлнинг асосий марказларидан бирига айланган.

 

 

Байрамона кайфиятни таниқли санъаткорларнинг чиқишлари ҳам давом эттирмоқда. 7 август куни Гулсанам Мамазоитова, Юлдуз Турдиева, Хулкар Абдуллаева, Ғуломжон Ёқубов ва бошқа ижодкорлар саҳнага чиқади. Кейинги кунларда эса МакСим, DJ Macarella, Ботир Қодиров, Зиёда Қобулова ва бошқа санъаткорлар ўзларининг бой ижоди билан сайлга ташриф буюрувчиларга ўзгача руҳ бағишлади.

 

 

“Қовун сайли – 2026” шу тариқа Хивада нафақат қовун ва ҳосил байрами, балки миллий маданият, гастрономия, туризм ва санъатни бирлаштирган катта халқ сайли руҳида бошланди.

 

Қадимий Хива бугун меҳмонларни ўзининг ширин қовунлари, бой маданияти, миллий таомлари ва самимий меҳмондўстлиги билан қарши олмоқда.