Боғдодда 41 нафар қизга ноқонуний диний таълим берилгани аниқланди
Диний таълим олган 41 нафар вояга етмаган қизларнинг ота-оналарига нисбатан ҳам маъмурий баённомалар расмийлаштирилди.
Боғдодда 41 нафар вояга етмаган қизга ноқонуний диний таълим берилгани аниқланди. Бу ҳақда Фарғона вилояти ИИБ хабар берди.
Маълум қилинишича, 1987 йилда туғилган, Боғдод туманининг Дурафшон маҳалласида яшовчи аёл ўз хонадонида ҳужра ташкил қилиб, 41 нафар вояга етмаган қизга диний сабоқ бериб келгани аниқланган.
Маълумотларга кўра, қизлар Қўқон шаҳри, Учкўприк, Ёзёвон, Бувайда ва Боғдод туманларида яшовчи фуқароларнинг фарзандлари бўлган. Улар ҳужрада ётиб таълим олган ва ҳар бир бола учун ота-оналар ойига 600 минг сўмдан ҳақ тўлаб келган.
Аниқланишича, диний таълим бериб келган аёл олий маълумот ва тегишли дипломга эга бўлмаган.
Ҳолат юзасидан ҳужра ташкил қилган аёлга нисбатан Ўзбекистон Республикаси Жиноят кодексининг 229²-моддаси 2-қисми билан жиноят иши қўзғатилган.
Шунингдек, ҳужрада диний таълим олган 41 нафар вояга етмаган қизларнинг ота-оналарига нисбатан Маъмурий жавобгарлик тўғрисидаги кодекснинг 47-моддаси 3-қисмига асосан маъмурий баённомалар расмийлаштирилган.
