Деновда уйи бузилган оилага янги турар жой қуриб берилади
Масала Сурхондарё вилояти ҳокими томонидан назоратга олинган.
Ижтимоий тармоқларда Сурхондарё вилояти Денов туманида фуқаронинг турар жойи бузилгани билан боғлиқ турли хабарлар тарқалди. Мазкур ҳолат юзасидан Мажбурий ижро бюросининг Сурхондарё вилояти бошқармаси расмий муносабат билдириб, мазкур уй суд ҳужжати асосида бузилганини таъкидлаган.
Ўрганишлар давомида турар жой фуқаронинг кадастр ҳужжатлари мавжуд бўлган қонуний ер майдонига туташ ҳудудда, фермер хўжалигининг дала майдонида қурилгани аниқланган.
Яъни, турар жойнинг айнан мазкур ҳудудда қурилиши қонунчилик талабларига зид экани суд ҳужжатида ўз аксини топган ва ижро ҳаракатлари шу ҳужжат асосида амалга оширилган.
Шу билан бирга, фуқаронинг уй-жой билан боғлиқ муаммоси эътибордан четда қолдирилмаган. Масала Сурхондарё вилояти ҳокими томонидан шахсан назоратга олинган ва фуқаро билан суҳбат ўтказилган.
Учрашув давомида оиланинг уй-жой муаммосини қонуний асосда ҳал этиш масаласи муҳокама қилинган. Хусусан, фуқаро учун қонуний ер майдонидан янги турар жой қуриш имконияти кўриб чиқилмоқда.
Шунингдек, мавжуд қурилиш материаллари ва уйнинг сақланиб қолган қисмларидан имкон қадар фойдаланиш, етишмайдиган қурилиш материалларини таъминлаш ҳамда янги турар жойни имкон қадар қисқа муддатда барпо этиш бўйича тегишли топшириқлар берилган.
Масала доирасида оилага зарур ижтимоий, тиббий ва психологик ёрдам кўрсатиш имкониятлари ҳам кўриб чиқилмоқда. Хусусан, оила аъзоларининг, жумладан, вояга етмаган фарзандларнинг руҳий ҳолатини инобатга олган ҳолда мутахассисларни жалб этиш режалаштирилган.
