Фарғонада Кадастрлар палатаси филиали раҳбарига нисбатан жиноят иши қўзғатилди
У ноқонуний қурилган савдо дўконига нисбатан чора кўрмаслик эвазига фуқародан 600 доллар олган.
Фарғона вилоятидаги туманлардан бирида Давлат кадастрлари палатаси филиали раҳбари ноқонуний қурилган савдо дўконига нисбатан қонуний чора кўрмаслик эвазига пул олгани аниқланди. Бу ҳақда ДХХ хабар берди.
Маълум қилинишича, мансабдор шахс 1990 йилда туғилган фуқаронинг ноқонуний қурилган савдо дўконига нисбатан Кадастр агентлигининг туман бўлими томонидан тузилган далолатномани бекор қилдириш ҳамда унга нисбатан қонуний чора кўрилишини бартараф этиш эвазига жорий йил июль ойи бошларида 600 АҚШ доллари олган.
Бироқ мансабдор шахс ваъдасини бажармаган ва кейинчалик фуқарога 500 АҚШ долларини қайтариб берган.
Мазкур ҳолат Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ўтказилган тезкор-қидирув тадбирлари давомида аниқланган.
Ҳолат юзасидан Кадастрлар палатаси филиали раҳбарига нисбатан жиноят иши қўзғатилган.
Ҳозирда мазкур иш бўйича дастлабки тергов ҳаракатлари олиб борилмоқда.
