Хивадаги «Қовун сайли» фестивали Гиннес рекордлари китобига киритилди
Фестиваль доирасида «Энг катта қовун дегустацияси» йўналишида рекорд қайд этилди.
Хивадаги «Қовун сайли» фестивалида жаҳон рекорди ўрнатилди.
7–9 август кунлари Хива шаҳридаги «Ичан қалъа» ва «Арда Хива» мажмуаларида «Қовун сайли» фестивали бўлиб ўтди.
Туризм қўмитаси ва Хоразм вилояти ҳокимлиги ҳамкорлигида ташкил этилган фестивалга жами 186 минг нафар меҳмон ташриф буюрди. Уларнинг 150 минг нафари маҳаллий, 36 минг нафари хорижий сайёҳлар бўлган.
Фестиваль доирасида «Энг катта қовун дегустацияси» йўналишида жаҳон рекорди қайд этилди. Guinness World Records сертификатига кўра, 9 август куни 259 киши бир вақтнинг ўзида 10 дан ортиқ қовун навини татиб кўрган.
Рекордни тасдиқлаш жараёнида Guinness World Records ҳаками, ташкилотнинг Туркия ва Марказий Осиё бўйича вакили Шейда Субаши Гемижи иштирок этган.
Фестиваль давомида қовун навлари, қишлоқ хўжалиги маҳсулотлари ва маҳаллий ишлаб чиқарувчиларнинг ишланмалари намойиш этилди. Шунингдек, маҳорат дарслари, кўргазмалар ва турли танловлар ташкил қилинди.
Тадбирнинг якуний қисмида танлов ғолиблари ҳам аниқланди. Учинчи ўрин Урганч давлат университети, «UzAuto» Хоразм филиали ва Автомобиль йўллари қўмитаси Хоразм вилояти бошқармасига берилди. Иккинчи ўринни Хоразм вилояти Қишлоқ хўжалиги бошқармаси эгаллади. Биринчи ўрин Янгиариқ тумани ҳокимлигига, бош соврин эса Хива шаҳар ҳокимлигига насиб этди.
Фестивалнинг ёпилиш маросимида россиялик хонанда Максим ҳам иштирок этди.
