Навоий шаҳaр ҳокимлиги АI ёрдамида тайёрланган ободонлаштириш суратлари учун узр сўради
Ҳокимлик ахборот хизматига кўра, материалларни тайёрлашда сунъий интеллект элементларидан фойдаланилган ва улар тегишли текширувдан ўтказилмасдан ижтимоий тармоқларда эълон қилинган.
Навоий шаҳрининг “Ҳаёт” маҳалласида амалга оширилган ободонлаштириш ва бунёдкорлик ишлари акс этган фотоматериалларда сунъий интеллект технологияларидан фойдаланилгани юзасидан шаҳар ҳокимлиги расмий муносабат билдирди.
Ҳокимлик ахборот хизматига кўра, ижтимоий тармоқларга материалларни тайёрлаш ва жойлаштириш жараёнида масъул ходимлар томонидан эътиборсизликка йўл қўйилган. Маҳалладаги ўзгаришларни кўргазмали форматда тақдим этиш мақсадида дизайн жараёнида сунъий интеллект элементларидан фойдаланилган ва материаллар тегишли текширувдан ўтказилмасдан эълон қилинган.
Ҳокимлик мазкур ҳолат ва жамоатчилик эътирозлари юзасидан фуқаролардан узр сўраган. Материалларни тайёрлашга масъул ходимлар огоҳлантирилгани маълум қилинган.
Шу билан бирга, ҳокимлик “Ҳаёт” маҳалласида аҳоли турмуш шароитини яхшилаш бўйича амалий ишлар амалга оширилганини билдирган. Ушбу ишларнинг натижаларини кўрсатиш учун муносабатга маҳалла ҳудудининг ҳозирги ҳолатини акс эттирувчи ишлов берилмаган фото ва видеолар илова қилинаётгани қайд этилган.
Ҳокимлик ахборот хизмати ОАВ вакиллари, блогерлар ва жамоатчилик вакилларини маҳаллага ташриф буюриб, амалга оширилган ишларни жойида баҳолашга таклиф қилган.
Шунингдек, келгусида ахборот хизмати фаолиятида шу каби хатоларга йўл қўймаслик учун назорат ва талаблар кучайтирилиши маълум қилинган.
