Навоийда қувур таъмирлаётган ишчи қум босиб қолиши оқибатида ҳалок бўлди
59 ёшли эркак олган жароҳатлари оқибатида воқеа жойида вафот этган.
Навоий вилояти Қизилтепа туманида қувур таъмирлаш ишлари вақтида бахтсиз ҳодиса содир бўлди. Оқибатда 59 ёшли ишчи вафот этди.
Бош прокуратура матбуот котиби Ҳаёт Шамсутдиновнинг маълум қилишича, ҳодиса 7 август куни туманнинг Навоий маҳалласида юз берган.
Дастлабки маълумотларга кўра, фуқаро C.Қ. ер остидан ўтган эски қувурларни таъмирлаш ишларини бажараётган вақтида унинг устига қум ўпирилиб тушган. Ишчи олган жароҳатлари оқибатида воқеа жойида вафот этган.
Марҳум “Sfat Plus Qurilish” МЧЖда ёлланма ишчи сифатида фаолият юритган.
Мазкур ҳолат юзасидан Қизилтепа тумани ИИБ ходимлари томонидан суриштирув ишлари олиб борилмоқда.
