Ўзбекистонда ўғил болалар кўпроқ туғилмоқда
2026 йил январь–июнь ойларида қайд этилган туғилишларда ўғил болалар улуши қиз болаларникидан юқори бўлди.
Миллий статистика қўмитаси маълумотларига кўра, 2026 йилнинг январь–июнь ойларида Ўзбекистонда 373 389 та тирик туғилиш ҳолати қайд этилган.
Туғилган чақалоқларнинг 192,9 минг нафари ёки 51,7 фоизи ўғил болалар, 180,5 минг нафари ёки 48,3 фоизи қиз болалар ҳиссасига тўғри келган.
Туғилишларнинг ҳудудий тақсимотида ҳам шаҳар ва қишлоқ жойлари ўртасида фарқ кузатилган. Қайд этилган туғилишларнинг 49 фоизи шаҳарларда, 51 фоизи эса қишлоқ жойларда тўғри келган.
Шунингдек, ҳисобот даврида Ўзбекистонда ҳар 1 000 нафар аҳолига 19,6 та туғилиш тўғри келган.
Таққослаш учун, Миллий статистика қўмитаси 2026 йилнинг январь–март ойларида мамлакатда 191 086 та тирик туғилиш қайд этилганини маълум қилган. Ўша даврда ўғил болалар улуши 51,5 фоизни, қиз болалар улуши эса 48,5 фоизни ташкил этган.
