Наманганда собиқ банк раҳбари 20 минг доллар пора билан қўлга тушди

 

Бош прокуратура ҳузуридаги Иқтисодий жиноятларга қарши курашиш департаментининг Наманган вилояти бошқармаси томонидан ўтказилган тезкор тадбирда собиқ банк раҳбари катта миқдордаги пул маблағларини олаётган вақтида ушланди.

 

Департаментнинг маълум қилишича, Янги Наманган туманида яшовчи фуқаро Департаментнинг Наманган вилояти бошқармасига мурожаат қилиб, Саноат-қурилиш банкининг Наманган вилоят филиалида собиқ бошқарувчи лавозимида ишлаган шахс устидан ариза билан мурожаат қилган.

 

Аризага кўра, собиқ банк раҳбари фуқаронинг Норин туманида жойлашган, балиқчиликни ривожлантириш мақсадида ижара асосида фойдаланишга берилиши режалаштирилган ер майдонини расмийлаштириб беришни ваъда қилган.

 

Бунинг учун у вилоят Ягона буюртмачи инжиниринг компанияси ҳамда вилоят Насос станциялари ва энергетика бошқармасида ишловчи мансабдор танишлари орқали ер майдонининг кадастр ҳужжатларини расмийлаштириб беришини айтиб, фуқаронинг 29 минг АҚШ доллари миқдорида пул маблағини беришини талаб қилган.

 

Аризачи олдиндан 20 минг АҚШ доллари беришга келишгани ҳақида маълум қилган.

 

Мурожаатда келтирилган маълумотларни текшириш мақсадида Департаментнинг Наманган вилояти бошқармаси томонидан 30 июль куни тезкор тадбир ўтказилган.

 

Тадбир давомида собиқ банк бошқарувчиси Давлатобод туманидаги кўп қаватли уйлар олдида аризачидан кимёвий ишлов берилган 20 минг АҚШ долларини олаётган вақтида қўлга олинган. Пул маблағлари ашёвий далил сифатида расмийлаштириб олинган.

 

Мазкур ҳолат юзасидан Департаментнинг Наманган вилояти бошқармаси томонидан Жиноят кодексининг тегишли моддалари билан жиноят иши қўзғатилган.

 

Ҳозирда ҳолат юзасидан терговга оид ҳаракатлар олиб борилмоқда.