“Ўзбекгидроэнерго” АЖ Бошқарув раисининг тадбиркорлар билан очиқ мулоқоти бўлиб ўтди
Кичик ва микро ГЭСлар қурилишига хусусий секторни кенг жалб қилиш масалалари муҳокама қилинди.
11 август куни Тошкент вилоятининг Бўстонлиқ туманидаги “UzHydroPower” заводида “Ўзбекгидроэнерго” АЖ бошқарув раиси Ислом Абдурахмонов иштирокида тадбиркорлар билан очиқ мулоқот ўтказилди.
Унда гидроэнергетика соҳасини ривожлантириш, кичик ва микро ГЭСлар қурилишини кенгайтириш ҳамда давлат-хусусий шериклик асосида хусусий сектор иштирокини ошириш масалалари муҳокама қилинди. Тадбирда 20 га яқин тадбиркор, “Гидропроект” АЖ ва бошқа ташкилотлар вакиллари, шунингдек, “Туронбанк” мутасаддилари иштирок этди.
Мулоқот давомида тадбиркорларга кичик ва микро ГЭСлар қуриш учун ҳудуд танлаш, лойиҳалаш, техник ечимларни ишлаб чиқиш, гидроагрегат, турбина ва генераторларни танлаш ҳамда етказиб бериш, қурилиш-монтаж ишларини ташкил этиш ва объектларни ишга тушириш жараёнлари бўйича маълумот берилди.
Тадбиркорларни қизиқтирган асосий масалалардан бири лойиҳаларни молиялаштириш бўлди. “Туронбанк” вакиллари имтиёзли кредитлардан фойдаланиш шартлари ҳамда зарур тартиб-таомиллар юзасидан тушунтириш берди.
Шунингдек, тадбирда “UzHydroPower” заводининг ишлаб чиқариш имкониятлари тақдим этилди. Хитойнинг “Zhejiang Jinlun Electromechanic Co., Ltd.” компанияси билан ҳамкорликда ташкил этилган корхона 1 кВтдан 40 МВтгача бўлган гидроагрегатлар, турбиналар ва генераторлар, шунингдек, сув насос агрегатлари ҳамда сув омборлари учун металл конструкциялар ишлаб чиқаради.
Мулоқот якунида тадбиркорларнинг таклиф ва мурожаатлари кўриб чиқилиб, кўтарилган масалалар бўйича амалий ечимлар белгилаб олинди ва масъулларга тегишли вазифалар юклатилди.
