Фермер хўжаликларининг бухгалтерия ҳисобини юритиш тартиби белгиланди
Унга кўра, “Солиқ-сервис” АЖнинг ҳудудий бўлимлари айрим фермер хўжаликларига бухгалтерия ва ҳисобот хизматларини бепул кўрсатади.
Фермер хўжаликларининг бухгалтерия ҳисобини юритиш тартиби тўғрисидаги низомни давлат рўйхатидан ўтказилди. Ҳужжат 2026 йил 11 август куни 3921-рақам билан рўйхатга олинган.
Низомга кўра, “Солиқ-сервис” АЖнинг ҳудудий бўлимлари фермер хўжаликларига бухгалтерия ҳисоби ва ҳисоботларини юритиш бўйича хизматлар кўрсатади.
Хизматлар қуйидаги фермер хўжаликларига бепул тақдим этилади:
— пахта ва ғалла етиштирувчи фермер хўжаликларига бухгалтерия ҳисоби ва ҳисоботларини юритиш;
— янги ташкил этилган фермер хўжаликларига уларнинг хоҳишига кўра дастлабки 6 ой давомида солиқ ва молиявий ҳисоботларни юбориш;
— раҳбари ёшлар бўлган янги ташкил этилган фермер хўжаликларига 2 йил давомида тегишли хизматларни кўрсатиш.
Шунингдек, “Солиқ-сервис” АЖ ҳудудий бўлимлари фермер хўжаликларини бухгалтерия ҳисоби ва ҳисоботини юритиш тизимига қабул қилиш, бухгалтерия ҳисобини ташкил этиш ва юритиш билан шуғулланади.
Бундан ташқари, фермер хўжалиги ходимларининг иш ҳақи, солиқлари ва бошқа тўловларини ҳисоблаш, солиқлар ва йиғимлар ҳисобини юритиш, солиқ, молиявий ҳамда статистик ҳисоботларни тайёрлаш ва инвентаризация жараёнларида иштирок этиш ҳам мазкур хизматлар қаторига киради.
