Тошкент аэропортида йўловчилар багажидан вино шишаларига яширилган қарийб 7 кг мефедрон аниқланди
Йўловчилар Бангкокдан келаётган бўлган.
Тошкент халқаро аэропортида Бангкокдан учиб келган икки йўловчининг багажидан 6,8 кг мефедрон синтетик гиёҳвандлик моддаси аниқланди. Бу ҳақда Божхона қўмитаси хабар берди.
4 август куни “Тошкент-Аэро” ИБК Контрабандага қарши курашиш шўбаси ҳамда “Тошкент халқаро аэропорти” чегара божхона пости ходимлари томонидан тезкор тадбир ўтказилган.
Маълум қилинишича, йўловчилар божхона назоратидан “яшил” йўлак орқали ўтган. Уларнинг багажлари текширилганда бир-бирига ўхшаш икки шишада вино ҳамда иккита пластик қути аниқланган. Уларда жами 6,8 кг оғирликдаги “Мефедрон” синтетик гиёҳвандлик моддаси яширилгани маълум бўлган.
Мазкур ҳолат юзасидан божхона органлари томонидан жиноят иши қўзғатилган.
Божхона маълумотларига кўра, 2026 йил бошидан буён ҳуқуқни муҳофаза қилувчи бошқа идоралар билан ҳамкорликда аниқланган 471 та ҳолатда жами қарийб 1 тонна 800 кг гиёҳвандлик воситаларининг ноқонуний олиб ўтилиши ва мамлакат ичидаги яширин айланишига чек қўйилган.
