“Айбимиз бўлса, узримизни сўраймиз” — Чиноз ҳокими
Чиноз тумани ҳокими Шерзод Солиҳов “Шармандали маҳалла” ва “Уятли хонадон” ёзувлари акс этган видео юзасидан изоҳ берди.
Ижтимоий тармоқларда Чиноз тумани ҳокими Шерзод Солиҳовнинг айрим маҳаллаларни “Шармандали маҳалла”, хонадонларни эса “Уятли хонадон” тоифасига ажратиш ҳақидаги топшириғи акс этган видео кенг муҳокамаларга сабаб бўлди.
Мазкур ҳолат юзасидан туман ҳокими изоҳ бериб, бундай топшириқ юқори турувчи ташкилотлардан берилмаганини, бу унинг шахсий ташаббуси бўлганини маълум қилган.
Ҳокимнинг сўзларига кўра, йиғилиш давомида ҳудудлардаги ободонлаштириш ва санитария ҳолатини яхшилаш мақсадида, топшириқлар бажарилмаган тақдирда “Шармандали маҳалла” ва “Уятли хонадон” каби ёзувлардан фойдаланиш мумкинлигини айтган. Бироқ бу амалиёт сифатида жорий этилмаган.
“Шармандали маҳалла” деган баннер ёпиштирилиб, яна ўша заҳоти кўчириб олиб кетилган. Фақат ижтимоий тармоққа чиқариш учун видеога олинган. Лекин бирорта хонадонга, бирорта маҳаллага осмаганман”, — деган Шерзод Солиҳов.
Ушбу ташаббусдан мақсад “Долзарб 40 кунлик” тадбири доирасида маҳаллаларда ободонлаштириш ишларини жадаллаштириш ва масъулларни фаолроқ ишлашга ундаш бўлганини таъкидлаган.
Ҳоким “Шармандали маҳалла” ва “Уятли хонадон” каби атамалар маҳалла фаоллари ёки аҳолини шарманда қилиш учун эмас, балки эътиборни муаммоларга қаратиш ва ободонлаштириш ишларини кучайтириш мақсадида қўлланганини билдирган.
Шу билан бирга, Шерзод Солиҳов ташаббус айримлар томонидан қўпол талқин қилинганини тан олган.
“Балки сал қўполроқ бўлиб кетган бўлиши мумкин, буни тан оламан”, — деган у.
Туман ҳокими хатога йўл қўйилган бўлса, бунинг учун узр сўрашга тайёрлигини ҳам билдирган.
“Беайб — Парвардигор. Айбимиз бўлса, узримизни сўраймиз”, — деган Шерзод Солиҳов.
