Тожикистон-Афғонистон чегарасида маҳаллий аҳоли ҳалок бўлди
Душанбе ҳодиса юзасидан Афғонистонга норозилик нотаси юборди.
Тожикистон Афғонистоннинг Бадахшон вилоятида юз берган қуролли тўқнашувлар оқибатида мамлакатнинг чегара ҳудудида фуқаро ҳалок бўлгани юзасидан Афғонистон томонига норозилик нотаси юборди. Бу ҳақда Тожикистон Ташқи ишлар вазирлигига таяниб ТАСС хабар берди.
Қайд этилишича, Афғонистоннинг Тожикистоннинг Тоғли Бадахшон автоном вилояти Дарвоз тумани билан чегарадош ҳудудларида сўнгги кунларда қуролли тўқнашувлар кучайган. Мазкур жанглар Тожикистоннинг чегара ҳудудларида хавфсизликка таҳдид туғдиргани айтилмоқда.
Тожикистон ТИВ маълумотига кўра, қуролли тўқнашувлар натижасида Тожикистон ҳаво ҳудуди бузилган, турар жой биноларига зарар етган ҳамда тинч фуқаро ҳалок бўлган.
Хусусан, 13 август куни Тоғли Бадахшон автоном вилоятининг Дарвоз туманидаги Даштоқ қишлоғида яшовчи фуқаро Панж дарёсининг Афғонистон қирғоғидан отилган ўқ узилиши оқибатида ҳалок бўлган.
Шу муносабат билан Душанбе Афғонистон томонига қатъий норозилик билдирган.
Тожикистон томони Кобулдан давлат чегарасининг дахлсизлигини ҳурмат қилиш, бундай ҳодисаларнинг такрорланишига йўл қўймаслик ва тегишли самарали чораларни кўришни талаб қилган.
Тожикистон ТИВ Бадахшондаги қуролли тўқнашувлар айрим ҳудудларда хавфсизликка таҳдид солаётгани ва халқаро ҳуқуқ меъёрларига зид оқибатларга олиб келаётганини таъкидлаган.
