Банкларнинг молиявий ҳолатини тиклаш режаларига қўйиладиган талаблар белгиланди
Банклар молиявий қийинчиликларга дуч келган тақдирда уларнинг фаолиятини тиклашга қаратилган режалар эндиликда белгиланган талаблар асосида ишлаб чиқилади.
Банкларнинг молиявий ҳолатини тиклаш режаларига қўйиладиган талаблар ҳамда уларни Марказий банкка тақдим этиш ва баҳолаш тартиби белгиланди.
Адлия вазирлиги томонидан Банкларнинг молиявий аҳволини тиклаш режасига қўйиладиган талаблар тўғрисидаги идоравий ҳужжат давлат рўйхатидан ўтказилди. Ҳужжат 2026 йил 13 август куни 3924-рақам билан рўйхатдан ўтган.
Унга кўра, банкнинг молиявий ҳолатини тиклаш режаси банк кузатув кенгаши томонидан тасдиқланади. Банк ички аудит хизмати эса ушбу режанинг ишлаб чиқилиши, янгиланиши ва амалга оширилишини йилига камида бир марта мустақил баҳолайди.
Тиклаш режаси қуйидаги йўналишларни ўз ичига олади:
— режани бошқариш бўйича маълумотлар;
— стратегик таҳлил;
— тиклаш кўрсаткичлари;
— тиклаш чора-тадбирлари;
— тиклаш сценарийлари;
— режа доирасида коммуникация қилиш тартиби;
— режани амалга оширишга тайёргарлик чоралари.
Банк тиклаш режасини ҳар йили янгилаши керак. Шунингдек, банкнинг ташкилий тузилмаси, фаолияти ёки молиявий ҳолатида режага таъсир қилиши мумкин бўлган сезиларли ўзгаришлар юз берган тақдирда ҳам ҳужжат қайта кўриб чиқилади.
Мазкур ҳужжат расмий эълон қилинган кундан бошлаб уч ой ўтгач кучга киради.
