Индонезияда 7,7 магнитудали зилзила оқибатида беш киши ҳалок бўлди
7,7 магнитудали зилзиладан сўнг 6,2 магнитудагача бўлган такрорий силкинишлар қайд этилди.
Индонезияда 7,7 магнитудали кучли зилзила содир бўлиб, камида беш киши ҳалок бўлди. Бу ҳақда Reuters Шарқий Нуса Тенггара губернатори Эмануэл Мелқуиадес Лака-Ленага таяниб хабар берди.
Губернаторнинг маълум қилишича, қурбонлар зилзила вақтида уйқуда бўлган ва биноларнинг вайроналари қулаши оқибатида ҳалок бўлган.
Аввалроқ Индонезиянинг Табиий офатларни бошқариш миллий агентлиги (BNPB) икки киши — бир эркак ва бир аёл ҳалок бўлганини билдирган эди.
Зилзила оқибатида Нагекео, Сикка ва Ғарбий Манггараи ҳудудларида талафотлар қайд этилган. Сикка туманидаги Эл Саи портига зарар етган, бир киши жароҳат олган. Зилзиладан чўчиган аҳоли уйларини тарк этиб, хавфсиз ҳудудларга чиқишга ҳаракат қилган.
Асосий зилзиладан кейин 6,2 магнитудагача бўлган такрорий ер силкинишлари ҳам кузатилган. Дастлабки маълумотларга кўра, улар қўшимча цунами хавфини юзага келтирмаган.
Аввалроқ зилзила сабаб Индонезиянинг учта вилоятида цунами ҳақида огоҳлантириш эълон қилинган эди. Маҳаллий нашрлар зилзила оқибатида уйлар, мактаблар, давлат идоралари ва тиббиёт муассасаларига зарар етганини хабар қилган.
Европа-Ўрта ер денгизи сейсмология маркази маълумотларига кўра, зилзила эписентри Лабуан Бажо шаҳридан 161 километр шимоли-шарқда, тахминан 35 километр чуқурликда жойлашган.
Айни пайтда маҳаллий ва фавқулодда вазиятлар хизматлари зарар кўрган ҳудудларда вазиятни мониторинг қилиш, аҳолини эвакуация қилиш ва жабрланганларга ёрдам кўрсатиш ишларини давом эттирмоқда.
