Исроил армияси “Ҳизбуллоҳ”нинг юқори мартабали қўмондони йўқ қилинганини маълум қилди
IDF қўмондоннинг Исроил ҳарбийларига қарши ҳужумларни, жумладан, дрон ҳужумларини тайёрлашда иштирок этганини билдирди.
Исроил мудофаа армияси (IDF) “Ҳизбуллоҳ”нинг “Бадер” отряди катта қўмондони Абу Ҳасан Алаа йўқ қилинганини маълум қилди. Бу ҳақда Point.md хабар берди.
IDF баёнотига кўра, зарба Ливан жанубидаги “хавфсизлик ҳудуди”да Исроил ҳарбийларига қарши “Ҳизбуллоҳ” ҳаракатларига жавобан берилган.
Исроил ҳарбийлари Абу Ҳасан Алаа IDF аскарларига қарши ҳужумларни, жумладан, улар томон дронлар учирилишини тайёрлашда иштирок этганини билдирди.
Исроилнинг Ливандаги “Ҳизбуллоҳ” объектлари ва жангариларига қарши зарбалари март ойининг бошидан бери давом этмоқда.
Маълумот учун, 26 июнь куни Байрут ва Тел-Авив Вашингтон кўмагида IDF'нинг Ливандан чиқарилиши ва “Ҳизбуллоҳ”ни қуролсизлантиришни назарда тутувчи тинчлик келишувини имзолаган. Бироқ шунга қарамай, томонлар ўртасида ўзаро зарбалар давом этмоқда.
