Тошкентда кўп қаватли уйнинг том қисмида ёнғин чиқди
Ёнғин соат 22:43 да қуршаб олинган, ҳозирда уни тўлиқ бартараф этиш ишлари олиб борилмоқда.
16 август куни соат 22:02 да Тошкент шаҳри Мирзо Улуғбек туманидаги Асака кўчасида жойлашган кўп қаватли уйнинг том қисмида ёнғин содир бўлди. Бу ҳақда Тошкент шаҳар Фавқулодда вазиятлар бошқармаси хабар берди.
Ҳодиса ҳақида хабар келиб тушгач, қутқарув бўлинмалари воқеа жойига зудлик билан етиб борган. Ёнғинни ўчириш ишлари олиб борилган.
Қайд этилишича, ёнғин соат 22:43 да қуршаб олинган. Вазият Тошкент шаҳар ФВББ томонидан назоратга олинган.
Ҳозирча ёнғин оқибатида жабрланганлар ёки зарар миқдори ҳақида маълумот берилмаган.
