"Ўзбекгидроэнерго" тизимидаги 8 та объектга янги JAC автомобиллари топширилди
Янги транспорт воситалари тоғли ва мураккаб ҳудудларда хизмат кўрсатиш ишларини тезкор ташкил этишга хизмат қилиши билдирилди.
“Ўзбекгидроэнерго” АЖ тизимидаги энергия ишлаб чиқарувчи корхоналарнинг транспорт базаси янги автомобиллар билан мустаҳкамланди, дея хабар бермоқда Жамият матбуот хизмати.
2026 йилнинг биринчи ярим йиллигида тизим корхоналари томонидан ишлаб чиқариш ва хўжалик фаолияти бўйича белгиланган режа топшириқлари ўз вақтида ва ортиғи билан бажарилгани қайд этилди.
Эришилган ижобий кўрсаткичларни муносиб эътироф этиш, корхоналарнинг моддий-техник базасини янада мустаҳкамлаш, ишлаб чиқариш жараёнларининг узлуксизлигини таъминлаш ҳамда Ўзбекистон Республикаси давлат мустақиллигининг 35 йиллиги арафасида соҳа меҳнат жамоаларини рағбатлантириш мақсадида энергия ишлаб чиқарувчи қатор филиалларнинг транспорт базаси янги автомобиллар билан мустаҳкамланди.
Жумладан, “Ўрта Чирчиқ ГЕСлар каскади”, “Фарҳод ГЕС”, “Самарқанд ГЕСлар каскади”, “Норин ГЕСлар каскади”, “Ҳисорак ГЕС” ва “Қамчиқ ГЕС” филиаллари, Сардоба сув омбори ҳамда Юқори Тўпаланг ҳудудидаги истиқболли лойиҳалар учун жами 8 та JAC пикап автомобили харид қилинди.
Янги автомобиллар энергетика объектларида техник хизмат кўрсатиш ва эксплуатация ишларини тезкор ташкил этиш, ходимларнинг ҳаракатчанлигини ошириш ҳамда хизмат вазифаларини ўз вақтида бажаришга хизмат қилади.
Қайд этилишича, гидроэнергетика объектларининг аксарияти тоғли ва мураккаб рельефли ҳудудларда жойлашган. Шу боис янги транспорт воситалари, айниқса, куз-қиш мавсумида ноқулай об-ҳаво ва йўл шароитларида хизмат кўрсатиш ишларини самарали ташкил этишда муҳим аҳамият касб этади.
“Ўзбекгидроэнерго” АЖ томонидан корхоналарнинг техник ва моддий базасини ривожлантириш ҳамда гидроэнергетика объектларининг барқарор ва узлуксиз фаолиятини таъминлаш бўйича ишлар давом эттирилиши маълум қилинди.
