Бошпанасиз шахсларни вақтинча бошпана билан таъминлаш тартиби белгиланди
Бошпанасиз шахслар кўча, вокзал, бозор ва бошқа жамоат жойларида ички ишлар ҳамда ижтимоий ходимлар томонидан аниқланади.
Ўзбекистонда муайян яшаш жойига эга бўлмаган шахсларни вақтинча бошпана ва ижтимоий тикланиш марказларига жойлаштириш тартиби белгиланди. Бу Ҳукуматнинг 18 августдаги 447-сон қарори билан тасдиқланган маъмурий регламентда белгиланган.
Унга кўра, ички ишлар органлари ходимлари ва маҳаллаларда комплекс ижтимоий хизмат кўрсатувчи ижтимоий ходимлар томонидан кўча, вокзал, бозор, ерости йўлаклари, яшаш учун мўлжалланмаган бинолар ва бошқа жамоат жойларида мунтазам равишда бошпанасиз шахслар аниқланади. Уларга Вақтинчалик бошпана ва ижтимоий тикланиш маркази хизматларидан фойдаланиш таклиф этилади.
Вояга етган бошпанасиз шахс марказга жойлашиш учун бевосита мурожаат қилади. Агар унинг вояга етмаган фарзандлари бўлса, улар ҳам ота ёки онаси билан биргаликда марказга жойлаштирилади.
Марказга олиб келинган шахслар туман ёки шаҳар даражасидаги тиббиёт муассасаларининг шошилинч қабул бўлимларида тиббий кўрикдан ўтказилади.
Шахсда марказга жойлаштиришга тўсқинлик қилувчи шошилинч тиббий ёрдамга эҳтиёж ёки юқумли касалликлар аниқланмаса, у марказга қабул қилинади.
Бошпанасиз шахс томонидан сўровномани тўлдириш марказга жойлашиш ҳамда унинг ички тартиб-қоидаларига риоя қилишга розилигини англатади.
Сўровнома шакллантирилганидан сўнг шахс марказга 7 кунгача жойлаштирилади. Айрим белгиланган ҳолатларда марказда қолиш муддати 6 ойгача узайтирилиши мумкин.
Аввалроқ Президент Шавкат Мирзиёевга муайян яшаш жойига эга бўлмаган шахсларга ижтимоий хизматлар кўрсатиш тизимини такомиллаштиришга қаратилган янги таклифлар тақдим этилганди.
Тақдимотда амалдаги реабилитация муассасаларини вақтинчалик бошпана ва ижтимоий тикланиш марказларига айлантириш режалаштирилаётгани маълум қилинганди.
