Навоийда уйга бостириб кириб, қизни боғлаб қўйган эркак 15 йилга қамалди
У бундан аввал ҳам турли жиноятлар учун жавобгарликка тортилган ва хавфли рецидивист деб қайд этилган.
Навоий вилоятининг Кармана туманида босқинчилик жиноятини содир этган, илгари ҳам жиноят учун жавобгарликка тортилган шахсга нисбатан суд ҳукми чиқарилди. Бу ҳақда Олий суд матбуот хизмати маълум қилди.
Судда аниқланишича, судланувчи 2024 йил апрель ойида Кармана тумани Калавот маҳалласидаги хонадонлардан бирига юзига оқ дока ниқоб тақиб, қўлида ошхона пичоғи билан ноқонуний равишда кирган.
У хонадон ётоқхонасида бўлган ёш қизга ҳаёти ва соғлиғи учун хавфли бўлган зўрлик ишлатган. Жабрланувчи қаршилик кўрсатганидан сўнг, унинг қўл ва оёқларини хонадаги чарм тасма ёрдамида боғлаб, пичоқ билан қўрқитган.
Шундан сўнг судланувчи хонадондаги тилла ва бошқа тақинчоқларни олиб, воқеа жойидан қочган.
Тезкор-қидирув тадбирлари натижасида у ҳодисадан бир кун ўтиб қўлга олинган.
Судланувчи бундан аввал ҳам турли жиноятлар учун жавобгарликка тортилгани ва хавфли рецидивист экани қайд этилган.
У Жиноят кодексининг 164-моддаси 4-қисми «д» бандида назарда тутилган жиноятни содир этишда айбли деб топилган ва 15 йил муддатга озодликдан маҳрум қилиш жазоси тайинланган.
