Тўқаев Қозоғистон ташқи сиёсатига муҳим ўзгартириш киритди
Янги қабул қилинган ҳужжатга кўра, Қозоғистоннинг собиқ президенти Нурсултон Назарбоев ташқи сиёсат масаллари бўйича фуқаролар ва давлат органларига мурожаат қилиш ҳуқуқидан умрбод маҳрум қилинди.
Қозоғистон Президенти Қосим-Жомарт Тоқаев мамлакатнинг Ташқи сиёсат концепциясига ўзгартириш киритди. Унга кўра, Қозоғистоннинг биринчи президенти Нурсултон Назарбоевнинг фуқаролар ва давлат органларига ташқи сиёсат масалалари бўйича мурожаат қилишга доир умрбод махсус ҳуқуқи бекор қилинди. Бу ҳақда Inbusiness.kz хабар берди.
Назарбоев 1991–2019 йилларда Қозоғистон президенти лавозимида фаолият юритган. 2022 йил январидаги оммавий норозиликлардан сўнг у сиёсий таъсирини сезиларли даражада йўқотди. Жумладан, Хавфсизлик кенгаши раиси лавозимидан истеъфога чиққан ва ҳукмрон партияга раҳбарлик қилишни тўхтатган.
2023 йил бошида Тоқаев “Қозоғистон Республикасининг Биринчи Президенти — Элбаси тўғрисида”ги қонунни бекор қилиш ҳақидаги ҳужжатни имзолаган. Мазкур қонун Назарбоевга «Элбаси» — “Миллат етакчиси” мақомини ҳамда бир қатор умрбод имтиёз ва кафолатларни берган эди.
Назарбоев «Элбаси» мақомини 2010 йилда олган. Ушбу мақом доирасида давлат органлари ички ва ташқи сиёсатнинг асосий йўналишларини у билан мувофиқлаштириши назарда тутилган эди.
Янгиланган Ташқи сиёсат концепциясида бошқа таҳририй ва институционал ўзгаришлар ҳам киритилган. Жумладан, «фуқаро» атамаси “Қозоғистон Республикаси фуқароси” шаклига ўзгартирилган.
