77 та чиқинди полигонида саралаш хизмати бўйича танлов эълон қилинди
Танлов орқали чиқиндиларни саралашни йўлга қўйиш ва қайта ишлашга йўналтириладиган чиқиндилар ҳажмини ошириш кўзда тутилган.
Ўзбекистонда 77 та қаттиқ маиший чиқинди полигонида чиқиндиларни саралаш хизматини ташкил этиш учун танловлар эълон қилинди.
Танловлар Чиқиндиларни бошқариш агентлиги ҳузуридаги Чиқинди полигонларини бошқариш дирекцияси томонидан давлат харидларининг электрон платформасига жойлаштирилган.
Лотлар ҳудудлар кесимида қуйидагича тақсимланган:
- Бухоро вилояти — 8 та;
- Жиззах вилояти — 11 та;
- Қашқадарё вилояти — 4 та;
- Қорақалпоғистон Республикаси — 2 та;
- Навоий вилояти — 7 та;
- Наманган вилояти — 6 та;
- Самарқанд вилояти — 2 та;
- Сурхондарё вилояти — 6 та;
- Сирдарё вилояти — 2 та;
- Фарғона вилояти — 6 та;
- Хоразм вилояти — 9 та;
- Андижон вилояти — 8 та;
- Тошкент вилояти — 6 та.
Танловлар орқали чиқиндиларни саралашни йўлга қўйиш, иккиламчи хомашёдан самарали фойдаланиш ҳамда қайта ишлашга йўналтириладиган чиқиндилар ҳажмини ошириш кўзда тутилган.
Маълумот ўрнида, Ўзбекистон Президентининг 2024 йил 4 январдаги 5-сон ҳамда 2025 йил 24 мартдаги 56-сон фармонларида чиқиндиларни саралаш ва қайта ишлаш жараёнларига хорижий ҳамда маҳаллий инвесторларни жалб этиш, шунингдек, чиқиндиларни саралаш фаолиятини амалга оширувчи инвесторларни белгиланган тартибда танлаб олиш вазифалари белгиланган.
Агентлик ҳузуридаги Чиқинди полигонларини бошқариш дирекцияси томонидан ҳудудий бошқармаларга чиқинди полигонларида саралаш ишларини ташкил этиш бўйича тегишли чора-тадбирлар ҳам тасдиқланган.
