Исроил бир ҳафта ичида Ғарбий Соҳилда 100 дан ортиқ фаластинликни ҳибсга олди
Ҳибсга олинганлар орасида болалар, журналистлар ва яқинда маҳбуслар алмашинуви доирасида озод қилинган собиқ маҳбус ҳам бор.
Исроил кучлари сўнгги бир ҳафта ичида ишғол қилинган Ғарбий Соҳилда 100 нафардан ортиқ фаластинликни ҳибсга олди. Бу ҳақда Al Jazeera хабар берди.
Фаластинлик маҳбуслар жамияти (PPS) пайшанба куни маълум қилишича, Исроил кучлари ҳудуд бўйлаб ҳибсга олиш амалиётларини кучайтирган. PPS ҳибслар давомида дала шароитида сўроқ қилиш, жисмоний тажовуз, маҳбусларнинг оила аъзоларига таҳдид қилиш ва айрим ҳолатларда судсиз қатл этиш каби ҳуқуқбузарликлар содир этилганини даъво қилган.
Шунингдек, Исроил кучлари уйларни кенг кўламда тинтув қилгани, мулкларга зарар етказгани ва айрим уйларни ҳарбий мақсадларда эгаллаб тургани айтилмоқда. Айрим фаластинликлар эса қариндошларига босим ўтказиш мақсадида ҳибсда ушлаб турилган.
Икки нафар журналист ҳамда яна бир неча собиқ маҳбус ҳам ҳибсга олинган.
Ташкилот Исроил кўчманчилари фаластинликлар ва уларнинг мол-мулкига ҳужумлар уюштираётганини ҳам билдирган. Унга кўра, ҳужумлар калтаклаш, йўлларни тўсиш ва транспорт воситаларига ҳужум қилишни ўз ичига олган ҳамда айрим ҳолларда Исроил кучлари ҳимояси остида амалга оширилган.
PPS Исроилнинг 2023 йил октябрида бошланган уруши ортидан Ғарбий Соҳилда 25 мингдан ортиқ фаластинлик, Ғазода эса яна минглаб одам ҳибсга олинганини маълум қилган.
