75 минг талаба хавфсизлиги таъминланади: Президент “Ёшлик” шаҳарчасидаги марказни кўрди
Вазиятлар маркази шаҳарчадаги 41 та талабалар ётоқхонасини қамраб олган. Тизим орқали талабаларнинг давоматини назорат қилиш ва ҳуқуқбузарликларнинг олдини олиш имкониятлари ҳам мавжуд.
Президент Шавкат Мирзиёев Тошкент шаҳрининг Олмазор туманидаги “Ёшлик” талабалар шаҳарчаси ҳокимлигида ташкил этилган вазиятлар маркази фаолияти билан танишди.
Рақамли технологиялар асосида ташкил этилган марказ талабалар хавфсизлигини таъминлаш, ҳудуддаги ижтимоий муҳитни реал вақт режимида кузатиш, давоматни назорат қилиш ҳамда ҳуқуқбузарликларнинг олдини олиш учун хизмат қилади.
Вазиятлар маркази шаҳарчадаги 41 та талабалар ётоқхонасини қамраб олган. Тизим орқали 75 мингга яқин талаба, шу жумладан, ётоқхоналарда истиқомат қилувчи 17,5 минг нафар йигит-қизнинг хавфсизлиги таъминланади. Уларнинг давоматини назорат қилиш ва ҳуқуқбузарликларнинг олдини олиш имкониятлари ҳам мавжуд.
Вазиятлар маркази 17 та ахборот тизими билан интеграция қилинган. Бу турли маълумотларни ягона рақамли платформада тезкор таҳлил қилиш ва зарур чораларни кўриш имконини беради.
Умумий майдони 1 368 квадрат метр бўлган талабалар шаҳарчаси ҳокимлиги биноси 2024 йилда қурилган. Уни мукаммал таъмирлаш, вазиятлар марказини ташкил этиш ва ҳудудни ободонлаштириш учун 33 миллиард сўм йўналтирилган.
Бинода вазиятлар марказидан ташқари стартап хонаси, олий таълим тарихи музейи, Ёшлар ишлари агентлигининг туман бўлими ҳамда хотин-қизлар тадбиркорлиги маркази ҳам жойлашган.
Ташриф давомида Президентга марказнинг ишлаш тамойиллари ва талабалар шаҳарчасидаги хавфсизлик ҳамда ижтимоий муҳитни реал вақт режимида назорат қилиш имкониятлари намойиш этилди.
Давлат раҳбари талабалар билан тизимли ишлаш, уларни қийнаётган масалаларни тезкор ҳал этиш бўйича тавсиялар берди. Вазиятлар маркази тажрибасини мамлакатдаги бошқа талабалар турар жойларида ҳам жорий этиш топширилди.
