Филиппинда паромдаги ёнғинда 35 киши ҳалок бўлди
Ёнган паромдан 30 кишининг жасади топилди. Қутқарувчилар кемага кириб, қидирув ишларини давом эттирмоқда.
Филиппинда ёнган паромдан 30 кишининг жасади топилди. Шу билан ҳодисада ҳалок бўлганлар сони 35 нафарга етди. Қидирув-қутқарув ишлари давом этмоқда.
Қутқарувчилар кучли тутун ва юқори ҳарорат сабаб бир неча кун кира олмаган кемага ёнғин ўчирилгач, илк бор кирган. Ҳодиса жойидан 30 кишининг жасади олиб чиқилган.
Расмийларга кўра, паромда ёнғин чиққан вақтда 130 нафардан ортиқ одам бўлган. Жума куни эрталаб 43 киши қутқарилгани, 84 киши эса бедарак йўқолгани маълум қилинган.
Соҳил қўриқлаш хизмати тарқатган суратларда паром ичидаги ётоқ жойлари бутунлай ёниб, металл ва кулга айлангани кўринади. Айрим суратларда куйган қолдиқлар орасидан инсон скелетига ўхшаш қолдиқлар ҳам акс этган.
Омон қолган йўловчилардан бири ёнғин дастлаб оз миқдордаги тутундан бошланганини, бироқ бир неча сония ичида кучли алангага айланганини айтди. Унинг сўзларига кўра, у ва бошқа йўловчилар қутқарилгунига қадар қарийб икки соат денгизда сузиб турган.
Ёнғин сабаби ҳозирча аниқланмаган. Филиппин Денгиз саноати бошқармаси тирик қолганларнинг кўрсатмаларига таяниб, кемада кетма-кет иккита портлаш овози эшитилгани ва шундан кейин ёнғин бошланганини билдирди.
330 кишига мўлжалланган паром 20 соатдан ортиқ давом этган сафар якунига яқинлашиб, шимолий Палаван провинциясидаги машҳур сайёҳлик маскани Корон томон кетаётган бўлган. Кемада бешта мотоцикл, электромобиль, форклифт, пикап ва бошқа юклар ҳам бўлган.
Ҳодиса Филиппинда сўнгги даврдаги навбатдаги йирик денгиз фожиаси бўлди. Январь ойида 300 нафардан ортиқ одам бўлган йўловчи кемаси мамлакат жанубидаги Сулу провинцияси томон йўлда чўкиб кетган ва 60 дан ортиқ киши ҳалок бўлган.
