Шавкат Мирзиёев Ўзбекистон Миллий музейи қурилишини кўздан кечирди

Президент Шавкат Мирзиёев пойтахт марказида барпо этилаётган Ўзбекистон Миллий музейининг қурилиш жараёни билан танишди.

Йирик лойиҳа давлат раҳбарининг 2025 йил 1 июлдаги тегишли қарорига мувофиқ амалга оширилмоқда. Шавкат Мирзиёев 2025 йил август ойида мазкур иншоот қурилишига тамал тошини қўйган эди.

Давлат раҳбарига музей ҳудудида олиб борилаётган қурилиш-монтаж ишлари, объектлар пойдеворини барпо этиш ҳамда муҳандислик инфратузилмасини яратиш жараёни ҳақида маълумот берилди.

Қайд этилишича, мажмуа Ўзбекистоннинг бой тарихи ва маданиятини акс эттирувчи, мамлакатнинг келажакдаги интилишларини намоён этувчи йирик маданий масканга айланиши кўзда тутилган.

Музейнинг меъморий қиёфаси ва мазмуний концепцияси халқаро илғор тажриба асосида ишлаб чиқилган. Лойиҳа машҳур япониялик меъмор Тадао Андо томонидан яратилган бўлса, экспозиция концепциясини Германиянинг “Atelier Brückner” ташкилоти тайёрлаган.

Мажмуанинг умумий майдони 3,9 гектарни, бино майдони эса 40 минг квадрат метрдан ортиқни ташкил этади. Бино уч қаватли асосий қисм ва икки қаватли ер ости қисмидан иборат бўлади.

Музей ҳудудининг 60 фоизи таълим ва илмий фаолият учун ажратилади. Бу ерда кўргазма заллари, кутубхона, реставрация лабораториялари ҳамда конференция заллари ташкил этилади. Шунингдек, оилалар ва ёшларнинг мазмунли ҳордиқ чиқариши учун ресторанлар ва болалар майдончалари ҳам бўлади.

Мажмуа бир вақтнинг ўзида 3,5 минг нафаргача ташриф буюрувчини қабул қилиш имкониятига эга бўлади. Музей экспозицияларида 10 мингга яқин тарихий ва санъат экспонатини намойиш этиш режалаштирилган.

Бино қуриб битказилгач, у атрофдаги Абулқосим мадрасаси, Халқлар дўстлиги саройи ва Миллий боғ билан биргаликда яхлит меъморий ансамблни ташкил этади.

Шунингдек, дунёнинг нуфузли музейлари, жумладан, Франциядаги Лувр, АҚШдаги Метрополитен музейи ва Британия музейи билан ҳамкорликда қўшма кўргазмалар ташкил этиш режалаштирилган.

Президент мутасаддиларга қурилиш ишларини белгиланган муддатларда, юқори сифат стандартларига мувофиқ амалга ошириш бўйича топшириқлар берди.