Ўзбекистон ТИВ Саудия Арабистонига ҳужумдан хавотир билдирди
Вазирлик тинч аҳоли, фуқаролик ва энергетика инфратузилмаси объектларига қарши куч ишлатилишини ҳамда Яқин Шарқ давлатлари хавфсизлигига таҳдид солувчи ҳар қандай ҳаракатларни кескин қоралади.
Ўзбекистон Республикаси Ташқи ишлар вазирлиги Яқин Шарқдаги вазиятнинг янада ёмонлашуви, хусусан, Саудия Арабистони ҳудудига ракета ва учувчисиз учиш аппаратлари орқали амалга оширилган ҳужумлардан чуқур хавотир билдирди.
Вазирлик тинч аҳоли, фуқаролик ва энергетика инфратузилмаси объектларига қарши куч ишлатилишини, шунингдек, минтақа давлатлари хавфсизлиги ва халқаро кема қатновига таҳдид солувчи ҳар қандай ҳаракатларни кескин қоралади.
ТИВ халқаро ҳуқуқ нормаларига, жумладан, давлатларнинг суверенитети, мустақиллиги ва ҳудудий яхлитлигини ҳурмат қилиш тамойилларига қатъий риоя этилиши зарурлигини таъкидлади.
Вазирликка кўра, юзага келган келишмовчиликлар фақат сиёсий-дипломатик воситалар, мулоқот ва ўзаро ҳурмат асосида бартараф этилиши лозим.
Ўзбекистон БМТ ва минтақа давлатларининг Яқин Шарқда кескинликни юмшатиш, можаронинг янада кенгайишига йўл қўймаслик ҳамда барқарор тинчликни таъминлашга қаратилган саъй-ҳаракатларини қўллаб-қувватлашини билдирди.
