Филиппиндаги паром ёнғини: қурбонлар сони 76 нафарга етди

Филиппин қирғоқ хавфсизлиги хизмати М/V June Aster паромидан яна 41 кишининг жасади топилганини маълум қилди. Ҳодиса оқибатида ҳалок бўлганлар сони 76 нафарга етган, 13 киши эса ҳануз бедарак йўқолган.

 

M/V June Aster пароми чоршанба куни кечқурун Маниладан Корон шаҳри томон йўл олган. Кема Палаван провинциясидаги Корон портига етиб келишига 2,2 километр қолганида унинг қуйи палубаларида ёнғин чиққан. Паром бортида жами 132 нафар йўловчи ва экипаж аъзоси бўлган. Ёнғин бошланганидан сўнг қутқарувчилар сувдан 43 нафар тирик қолган кишини олиб чиққан.

 

Тергов маълумотларига кўра, омон қолганлар ёнғин бошланишидан олдин кетма-кет портлашлар овозини эшитганини билдирган. Шундан сўнг аланга йўловчилар жойлашган ҳудудларга тез тарқалган. Расмийлар бунга шамол ҳам сабаб бўлган бўлиши мумкинлигини айтмоқда.

 

Айрим йўловчилар ёнғинни кўргач, сувга сакраган ва қутқарув жилетларини олишга улгурмаган.

 

Ҳозирда суд-тиббий экспертлар ва полиция ҳалок бўлганларнинг шахсини аниқлаш учун уларнинг шахсий буюмлари ҳамда ДНК таҳлилларидан фойдаланмоқда.

 

Шунингдек, кемадаги хавфсизлик чораларига риоя қилингани ва фалокатнинг дастлабки дақиқаларида капитан қандай ҳаракат қилгани юзасидан расмий текширув олиб борилмоқда.

 

Паром оператори "Atienza Interisland Ferries" компанияси терговда тўлиқ ҳамкорлик қилишини ҳамда жабрланганлар оилаларига турар жой, транспорт ва тиббий ёрдам кўрсатишини билдирган.

 

Аввалроқ ёнган паромдан 30 кишининг жасади топилиб ҳодисада ҳалок бўлганлар сони жами 35 нафарни ташкил қилганди.