Қамчиқ довонидаги кутилмаган саргузашт: йўлини йўқотган 17 кишига ёрдам берилди
Фуқаролар яшаш манзилларига соғ-саломат етказилган.
Тошкент вилоятининг Оҳангарон туманида тоғли ҳудудга дам олиш учун чиқиб, адашиб қолган 17 нафар фуқарога амалий ёрдам берилди.
12 сентябрь куни соат 21:27 да “112” тизими орқали “Қамчиқ” Махсус қутқарув бошқармасига фуқаролар тоғли ҳудудда адашиб қолгани ҳақида хабар келиб тушган.
Маълум бўлишича, улар “Тошкент–Ўш” автомобиль йўлининг “Водий–Тошкент” йўналишидаги 107-километр, “Чинор” ҚФЙ ҳудудида бўлган.
Хабардан сўнг воқеа жойига қидирув-қутқарув бўлинмалари жалб этилган. Қутқарувчилар қидирув ишлари давомида тоғ қияликларидан 17 нафар фуқарони топиб, хавфсиз ҳудудга олиб тушган.
Фуқаролар яшаш манзилларига соғ-саломат етказилган. Ҳодиса оқибатида ҳеч ким тан жароҳати олмаган.
