Суд ишларига аралашув: мансабдорлар 5 йилгача қамалиши мумкин

Ўзбекистонда суд ишларини ҳал этишга ноқонуний аралашганлик ва суд биносида тартибни бузганлик учун жавобгарлик кучайтирилди. Тегишли қонун билан Жиноят кодекси ҳамда Маъмурий жавобгарлик тўғрисидаги кодексга ўзгартириш ва қўшимчалар киритилди.

 

Жиноят кодексининг 236-моддаси янги таҳрирда баён этилди:

 

Тергов қилишга аралашиш, яъни ишни ҳар томонлама, тўла ва холисона ўрганилишига тўсқинлик қилиш мақсадида суриштирувчи, терговчи ёки прокурорга турли шаклда қонунга хилоф равишда таъсир ўтказиш 3 йилгача ахлоқ тузатиш ишлари ёки 1 йилдан 3 йилгача озодликни чеклаш ёки уч йилгача озодликдан маҳрум қилиш билан жазоланади.

 

Суд ишларини ҳал этишга аралашиш, яъни муайян ишнинг ҳар томонлама, тўла ва холисона кўриб чиқилишига тўсқинлик қилиш ёхуд адолатсиз ҳукм, ҳал қилув қарори, ажрим ёки қарор чиқарилишига эришиш мақсадида судьяга ёки халқ маслаҳатчисига турли шаклларда қонунга хилоф равишда таъсир ўтказиш 3 йилгача ахлоқ тузатиш ишлари ёки 1 йилдан 3 йилгача озодликни чеклаш ёхуд 3 йилгача озодликдан маҳрум қилиш билан жазоланади.

 

Ушбу модданинг биринчи ёки иккинчи қисмида назарда тутилган ҳаракатлар мансабдор шахс томонидан содир этилган бўлса, муайян ҳуқуқдан маҳрум этиб, 3 йилдан 5 йилгача озодликни чеклаш ёки 3 йилдан 5 йилгача озодликдан маҳрум қилиш билан жазоланади.

 

Бундан ташқари, Маъмурий жавобгарлик тўғрисидаги кодекснинг 180-моддасига (судга ҳурматсизлик) қўшимча киритилди.

 

Унга кўра, гувоҳ, жабрланувчи, даъвогар, жавобгар, ишда қатнашувчи бошқа шахсларнинг судга келишдан қасддан бўйин товлашида ёки мазкур шахсларнинг ва бошқа фуқароларнинг раислик қилувчи фармойишига бўйсунмаслигида ёхуд суд мажлиси пайтида ёки суд биносида тартибни бузишда ўз ифодасини топган судга ҳурматсизлик базавий ҳисоблаш миқдорининг 1 бараваридан 3 бараваригача миқдорда жарима солишга сабаб бўлади.

 

Қонун Қонунчилик палатаси томонидан 24 февралда қабул қилиниб, Сенат томонидан 19 майда маъқулланган. Ҳужжат суднинг мустақиллиги ва судьялар дахлсизлигини таъминлаш ҳамда уларнинг фаолиятига ҳар қандай аралашувларнинг олдини олишга қаратилган.