Саида Мирзиёева “Ўзбекфилм” киностудиясини ривожлантириш бўйича режаларини маълум қилди
Саида Мирзиёева Абу Али ибн Синонинг болалиги ҳақидаги тарихий фильм суратга олинаётган майдонда ҳам бўлди.
Саида Мирзиёева “Ўзбекфилм” киностудиясига ташриф буюриб, унинг жорий ҳолати ва фаолияти билан танишди. У киностудияни замонавий Ўзбекистон кино индустриясининг миллий бренди ва таянч марказига айлантириш зарурлигини таъкидлади.
Унинг қайд этишича, бунинг учун кино соҳасидаги бошқарув тизимини ўзгартириш керак. Давлат фильмнинг ижодий жараёнига аралашадиган буюртмачи эмас, балки соҳани ривожлантирувчи ва молиявий қўллаб-қувватловчи стратегик ҳамкор бўлиши лозим.
Шунингдек, хусусий киностудиялар, мустақил продюсерлар ва ижодкорларни индустриянинг асосий ҳаракатлантирувчи кучига айлантириш режалаштирилмоқда. Кино ишлаб чиқаришдан тортиб томошабинга етказишгача бўлган жараён, жумладан, молиялаштириш, дистрибуция, прокат, фестиваллар ва экспорт тизимини замонавий талаблар асосида янгилаш кўзда тутилган.
Миллий кино меросини сақлаш, фильмларни реставрация қилиш ва рақамлаштириш тизимини кучайтириш, янги авлод ижодкорларини тайёрлаш ҳамда халқаро тажриба алмашинувини кенгайтириш ҳам устувор йўналишлар сифатида қайд этилди.
Саида Мирзиёева соҳада профессионал муҳит ва ўзини ўзи бошқариш маданиятини шакллантириш, киноижодкорларнинг фикри, тажрибаси ва касбий обрўсини муносиб қадрлаш муҳимлигини таъкидлади.
Ташриф давомида у Абу Али ибн Синонинг болалиги ҳақидаги тарихий фильм суратга олинаётган майдонда ҳам бўлди. Улкан декорациялар ва ижодий жамоанинг иш жараёни билан танишди.
