Уй-жой ва мерос: етим болалар ҳуқуқи қандай ҳимоя қилинади?
Янги қонун билан васийлик ва ҳомийлик тўғрисидаги қонунчиликка муҳим ўзгартишлар киритилмоқда.
Амалдаги тартибга кўра, васийлар ва ҳомийлар ўз қарамоғида тарбияланаётган етим ҳамда ота-она қарамоғидан маҳрум бўлган болаларнинг ҳуқуқ ва манфаатларини ҳимоя қилади.
Шунингдек, 18 ёшдан ошган шахс муомалага лаёқатсиз деб топилган, муомала лаёқати чекланган ёки жисмоний саломатлиги сабабли ўз ҳуқуқларини мустақил ҳимоя қила олмайдиган ҳолатларда ҳам васийлик ёки ҳомийлик белгиланади.
Аввал васий ва ҳомийларга ўз қарамоғидаги шахснинг мол-мулки, мероси ёки ҳадяларидан воз кечиш ҳуқуқи берилган эди. Янги қонунчиликка кўра, энди улар ўз қарамоғидаги шахснинг ҳадяси, мол-мулки ёки меросидан воз кеча олмайди.
Бу ўзгартишлар ҳимояга муҳтож болаларга мерос бўлиб қолган ёки қоладиган уй-жойда яшаш ва ундан фойдаланиш ҳуқуқларини сақлаб қолиш, шунингдек, уларга тегишли мол-мулкнинг бегоналаштирилишининг олдини олишга хизмат қилади.
