Президент Шавкат Мирзиёев Нукусдаги тиббиёт академияси билан танишди

Президент Шавкат Мирзиёев Қорақалпоғистон илмий-амалий тиббиёт академияси фаолияти билан танишди.

 

 

Қорақалпоғистонда шифокорлар ва ўрта тиббиёт ходимларининг малакасини тизимли оширишга алоҳида эътибор қаратилмоқда. Янги ташкил этилган академия соҳа ходимларини халқаро стандартлар ва илғор технологиялар асосида қайта тайёрлашнинг таянч марказига айланади.

 

 

Давлат раҳбарининг 2024 йил 24 декабрдаги тегишли қарорига мувофиқ, ҳудуддаги тиббиёт муассасаларини хусусий сектор иштирокида илм-фан, таълим ва амалиётни бирлаштирган ягона инновацион кластерга айлантириш белгиланган.

 

 

Ана шу мақсадда 4,6 гектар майдонда умумий қиймати 154 миллиард сўм бўлган замонавий мажмуа барпо этилди, 80 та янги иш ўрни яратилди.

 

 

Академияда йилига 3 минг нафар шифокор ҳамда 6 минг 800 нафар ўрта тиббиёт ва фармацевтика ходимининг малакасини ошириш имконияти мавжуд. Шунингдек, Оролбўйи ҳудудидан ҳар йили 100 нафарга яқин клиник ординатор тайёрланади.

 

 

Мутахассисларнинг амалий кўникмаларини ривожлантириш учун 18 та симуляцион хона ташкил этилган. Уларда 50 дан ортиқ йўналиш бўйича рақамли ва симуляцион таълим йўлга қўйилган. Узоқ ҳудудлардан келадиган мутахассислар учун эса 72 ўринли меҳмонхона фаолият юритмоқда.

 

Академия замонавий тиббий технологиялар билан ҳам жиҳозланган. Хусусан, бу ерда Марказий Осиёда ягона экани қайд этилган «Edge Medical» жарроҳлик роботи ўрнатилган. Қурилма симуляцион машғулотлардан ташқари, реал клиник шароитда масофавий операцияларни бажариш имконини беради.

 

 

Академия АҚШнинг Питтсбург ва Германиянинг Фрайбург университетлари каби хорижий тиббиёт марказлари ва етакчи олийгоҳлар билан ҳамкорлик қилмоқда. Бу ерда халқаро ўқув курслари ва қўшма илмий тадқиқотлар ташкил этилиб, телемедицина ҳамда рақамли таълим технологиялари жорий этилган.

 

Давлат раҳбари академиядаги амалий машғулот хоналарини кўздан кечириб, талабалар ва тиббиёт соҳаси ходимлари билан суҳбатлашди.