«Жиноятчи қонун доирасидаги энг оғир жазога тортилади» — Саида Мирзиёева Наманганда 5 ёшли қизча зўрлангани ҳақида
Бундай жиноятлар учун жазони кучайтириш масаласи кўриб чиқилаётгани билдирилди.
Наманганда 5 ёшли қизчанинг зўрланиши юзасидан Саида Мирзиёева муносабат билдирди. У воқеа тафсилотларидан хабар топгач, жиноятдан чуқур ғазабланганини қайд этди.
«Назаримда, бундай ваҳшиёна жиноятлар учун ўлим жазосини қўллаш керак», — дея ёзди Саида Мирзиёева.
Унинг қайд этишича, амалдаги қонунчиликда ўлим жазоси назарда тутилмаган. Шу сабабли жавобгарликни максимал даражада кучайтириш мақсадида қонун ҳужжатларига тегишли ўзгартиришлар киритиш бўйича таклиф тайёрланмоқда.
Шунингдек, масъул идораларга зарур кўрсатмалар берилгани билдирилди.
«Жиноятчи қонун доирасидаги энг оғир жазога тортилади» — дея таъкидлади Президент администрацияси раҳбари.
Бундан ташқари, воқеанинг олдини олишда бепарволикка йўл қўйган ва вояга етмаган болани ҳимоя қила олмаган масъуллар ҳам жазоланиши айтилди.
