Пахта йиғим-терими мавсуми: меҳнат қонунчилигига риоя этилиши назорат қилинади
Мавсум давомида мажбурий ва болалар меҳнатининг олдини олиш бўйича мониторинг ишлари олиб борилади.
Ўзбекистонда пахта йиғим-терими мавсуми давомида меҳнат қонунчилигига риоя этилиши ҳамда мажбурий ва болалар меҳнатининг олдини олиш бўйича мониторинг ишлари олиб борилмоқда. Бу ҳақда Камбағалликни қисқартириш ва бандлик вазирлиги хабар берди.
Маълум қилинишича, бунинг учун тегишли ташкилотлар вакилларидан иборат штаб ва ишчи гуруҳлар фаолияти йўлга қўйилган. Улар пахта йиғим-терими жараёнида меҳнат қонунчилиги талабларига риоя этилишини назорат қилади.
Иш берувчилар ва фермер хўжаликлари ходимларни мажбуран меҳнатга жалб қилмаслиги, болалар меҳнатидан фойдаланмаслиги ҳамда меҳнат муносабатларини қонунчиликда белгиланган тартибда расмийлаштириши лозимлиги қайд этилди.
Шунингдек, иш вақти, дам олиш ва меҳнатга ҳақ тўлаш билан боғлиқ талабларнинг бажарилиши ҳам назорат қилинади.
Меҳнат ҳуқуқлари бузилган фуқаролар Давлат меҳнат инспекциясига @munosibmehnat_bot орқали ёки 1176 рақами орқали мурожаат қилиши мумкин.
