Киев ва Москва зарбалар алмашди: 5 киши ҳалок бўлди

Киев ва Москва томонидан амалга оширилган узоқ масофали зарбалар оқибатида камида беш киши ҳалок бўлди. Бу ҳақда Al Jazeera хабар берди.

 

Россия Украинанинг Одесса вилоятида Либерия байроғи остида сузаётган кемага ҳужум қилди. Украина Денгиз портлари маъмурияти маълумотларига кўра, ҳужум оқибатида бир киши ҳалок бўлган, уч киши жароҳатланган. Кемадаги яна 12 нафар экипаж аъзоси хавфсиз эвакуация қилинган.

 

Россия сўнгги вақтларда Украинадаги Қора денгиз портларига кириш имкониятини амалда чеклаб қўйган. Аввал бу портлар жаҳон озиқ-овқат экспортининг муҳим манбаларидан бири бўлган. Дон ва пўлат ташиётган фуқаролик кемаларига берилган зарбалар Украина иқтисодиётига жиддий зарар етказмоқда.

 

Россия томонидан тайинланган Луганск вилояти губернатори маълумотига кўра, Россия босиб олган ҳудудга Украина томонидан берилган зарба оқибатида икки киши ҳалок бўлган.

 

Запорижжя вилоятининг Россия томонидан тайинланган расмийлари эса Украина дронлари ҳужуми оқибатида бир киши ҳалок бўлгани, 10 киши жароҳатланганини билдирди.

 

Шунингдек, Россия ОАВлари Украина билан чегарадош Белгород вилоятида дрон ҳужуми оқибатида бир киши ҳалок бўлгани ҳақида хабар берди.

 

Айни пайтда Россиянинг Киевдаги Шимолий кўприкка берган зарбаси оқибатида икки киши жароҳатланди. Бу Россиянинг икки кун ичида Украина пойтахтидаги муҳим кўприкка иккинчи ҳужуми бўлди.

 

Россия дипломатлар ва хорижликларни Киевни тарк этишга чақирди

 

Россия Ташқи ишлар вазирлиги шанба куни Украинадаги дипломатлар ва хорижликларни яна бир бор огоҳлантирди. Вазирлик уларни Киевни тарк этишга чақириб, шаҳарда қолиш хавф туғдириши мумкинлигини билдирди. Шунга қарамай, кўплаб хорижий элчихоналар ҳамон Киевда фаолият юритмоқда.

 

Россиянинг Украинага қарши кенг кўламли уруши бешинчи йилга кирган. Ҳозирча можаронинг секинлашаётганига ишора йўқ.

 

Al Jazeera қайд этишича, Россия қўшинларининг жанг майдонидаги ҳудудий ютуқлари деярли рекорд даражадаги паст кўрсаткичгача секинлашган. Украинанинг қарши ҳужумлари, жумладан, мамлакат шарқидаги Лиман шаҳри атрофида давом этаётган операция Россиянинг бошқа ҳудудлардаги олдинга силжишини чекламоқда.

 

Россия сўнгги ойларда фуқаролик инфратузилмасига ҳужумларини кучайтирди. Бунда реактив двигателли узоқ масофали зарба дронларидан фойдаланиш ҳам кўпайган. Улар тезроқ ҳаракатлангани сабабли бундай дронларни уриб тушириш қийинроқ.

 

Украина ҳам Россия ҳудудига узоқ масофали зарбаларни кучайтирган. Жумладан, Россиянинг ички ҳудудларидаги нефть инфратузилмаси ва ҳарбий-саноат объектлари нишонга олинмоқда.