Ўзбекистонда қишлоқ хўжалиги корхоналарига дизель ёнилғиси учун субсидия берилади
Бунда субсидия миқдори 2 миллион сўмдан ошмайди.
Ўзбекистонда айрим қишлоқ хўжалиги корхоналарига дизель ёнилғиси харажатларини қоплаш учун субсидия ажратилади. Бу Президент фармонида белгиланди, дея хабар бермоқда "Ҳуқуқий ахборот" Тelegram-канали.
Ҳужжатга кўра, 2026 йил 1 апрелдан 1 июлгача қишлоқ хўжалиги корхоналари томонидан биржа орқали харид қилинган ҳар бир тонна дизель ёқилғиси қийматининг 13 миллион сўмдан ошган қисми учун субсидия берилади. Бунда субсидия миқдори 2 миллион сўмдан ошмайди.
Мазкур маблағлар республика бюджети ҳисобидан Аграр соҳада тўловлар агентлиги (Агентлик) орқали ажратилиши кўзда тутилган.
Фармонга мувофиқ, 2026 йил 1 сентябрдан бошлаб Қишлоқ хўжалигини давлат томонидан қўллаб-қувватлаш жамғармасининг айрим субсидия ажратиш ваколатлари Агентликка ўтказилади.
Жумладан, қишлоқ хўжалиги субъектларига ўз маблағлари ва тижорат банклари кредитлари ҳисобидан етиштирилган пахта хомашёсини биржада сотишда расмийлаштирилган электрон ҳисобварақ-фактура қийматининг бир қисмини қоплаш бўйича субсидиялар ажратилади.
Шунингдек, пахта-тўқимачилик кластерлари ҳамда ип-калава ишлаб чиқариш занжирига эга тўқимачилик корхоналарига ўз маблағлари ҳисобидан харид қилинган пахта хомашёси қийматининг бир қисмини қоплаш механизми ҳам Агентлик ваколатига ўтказилади.
