Исроил Ғарбий соҳилда ҳарбий операция бошлади: икки шаҳар блокадага олинди
Операция 23 октябрь куни икки нафар Исроил ҳарбийси ҳалок бўлган ҳужумдан кейин бошланди.
Исроил армияси Иордан дарёсининг Ғарбий соҳилидаги Хеврон шаҳри ва унинг атрофида бир неча кун давом этиши кутилаётган кенг кўламли ҳарбий операцияни бошлади. Операция доирасида Хеврон ва унга қўшни Халхул шаҳарлари блокадага олинган.
Исроил армияси ва ички хавфсизлик хизмати — SHABAK 23 октябрь куни Исроил ҳарбийларига қилинган ҳужумдан кейин тинтувлар бошланганини маълум қилди. Ҳужум оқибатида икки нафар ҳарбий ҳалок бўлган, яна уч нафари яраланган. Ҳужумда гумон қилинган икки нафар фаластинлик ўлдирилган.
Исроил бош вазири Бинямин Нетаньяху ҳарбийлар йирик терактнинг олдини олганини билдириб, Хевронни зудлик билан блокадага олишга буйруқ берган.
Исроил армияси ва ШАБАК қўшма баёнотида операция ҳудудда террорчилик инфратузилмаси ҳамда қуролларни аниқлаш ва йўқ қилишга қаратилганини таъкидлаган. Амалиётда чегара полицияси ва фуқаролик маъмурияти ҳам қатнашмоқда.
Хеврон ва Халхулда йўлларга тўсиқлар ўрнатилган. Маҳаллий аҳоли ҳудудни фақат учта белгиланган назорат-ўтказиш пункти орқали, текширувдан ўтганидан кейин тарк этиши мумкин. Исроил ҳарбийлари хавфсизликка таҳдид солади, деб ҳисобланган ноқонуний қурилмаларни ҳам бузишни режалаштирмоқда.
Исроил томонининг билдиришича, операциянинг асосий қисми ҳужумчилар ҳаракатланган ҳудудда олиб борилмоқда. Шу билан бирга, Ғарбий соҳилнинг бошқа ўнлаб аҳоли пунктларида ҳам ҳарбий амалиётлар ўтказилмоқда.
Вазият Исроилда 27 октябрга белгиланган парламент сайловларига бир неча кун қолганида кескинлашди.
