Тадбиркорга босим ва 65 млн сўмлик талаб: ҳоким ўринбосарига жиноят иши қўзғатилди
У тадбиркордан уйига қувватли қуёш панелларини ўрнатиб беришни талаб қилган.
Давлат хавфсизлик хизматининг Наманган вилояти бўйича бошқармаси ходимлари Бош прокуратура ҳузуридаги Департамент билан ҳамкорликда ўтказган тезкор тадбирда Косонсой тумани ҳокими ўринбосари ушланди.
Маълум қилинишича, мансабдор шахс ҳокимият томонидан маҳаллий тадбиркорга ижара асосида берилган ер майдонини бошқа тадбиркорга олиб бериш билан таҳдид қилган. Бунинг эвазига у ўзининг яшаш хонадонига 20 кВт қувватли қуёш панелларини ўрнатиб беришни талаб қилган.
Ҳоким ўринбосари қуёш панелларини сотиб олиш ва ўрнатиш харажатлари учун 65 млн сўмни хизмат автомашинасида олаётган вақтида ашёвий далиллар билан ушланган.
Ҳолат юзасидан мансабдор шахсга нисбатан Жиноят кодексининг 210-моддаси билан жиноят иши қўзғатилган. Ҳозирда тергов ҳаракатлари олиб борилмоқда.
