Уятли сўзлар ва тарқалган видео: Қўқонда эркак 10 суткага қамалди
Жамоат жойида юриш-туриш қоидаларини бузган эркак жазоланди.
Фарғона вилоятининг Қўқон шаҳрида жамоат жойида юриш-туриш қоидаларини бузган эркакка 10 сутка маъмурий қамоқ жазоси тайинланди. Ҳолатга алоқадор аёл эса жаримага тортилди.
Қайд этилишича, Қўқон шаҳрининг Туркистон кўчасидаги автобекатда эркак ва аёлнинг хатти-ҳаракатлари профилактика инспектори эътиборини тортган. Инспектор уларга жамоат жойида белгиланган қоидаларга риоя қилиш зарурлигини тушунтирган. Шундан сўнг у такси тўхтатиб, уларни жўнатган.
Бироқ эркак автомобилга ўтирганидан кейин уятли сўзларни ишлатган. Унинг хорижий фуқаро билан суҳбати видеога олиниб, ижтимоий тармоқларда тарқалган ва муҳокамаларга сабаб бўлган.
Туризм хавфсизлиги бошқармаси ходимининг маълум қилишича, ҳолат ўрганилганда видеони тарқатган шахс Қўқонга саёҳат мақсадида келган хорижий фуқаро экани аниқланган. У видеодаги эркак билан аввалдан таниш бўлмаган.
Эркак эса ўз изоҳида автомобиль эшигини ёпаётганида оёғини қисиб олгани, оғриқ сабаб ноўрин сўзларни ишлатиб юборганини билдирган.
Ҳолат юзасидан тўпланган ҳужжатлар қонуний қарор қабул қилиш учун жиноят ишлари бўйича Қўқон шаҳар судига юборилган. Суд мажлисида томонларнинг тушунтиришлари тингланиб, аёлга жарима, эркакка эса 10 сутка маъмурий қамоқ жазоси тайинланган.
