12 миллион киши хавф остида: Ҳиндистонга кучли циклон яқинлашмоқда
Ҳиндистоннинг шарқий соҳилларига яқинлашаётган Арнаб циклони сабабли минглаб одамлар эвакуация қилинмоқда.
Ҳиндистон шарқий соҳилларига “ўта кучли” деб баҳоланган Арнаб циклони яқинлашмоқда. Расмийлар хавфли ҳудудлардан ўн минглаб аҳолини эвакуацияқилмоқда. Циклоннинг 28 октябрь, чоршанба куни эрталаб қуруқликка етиб келиши кутилмоқда.
Ҳиндистон метеорология департаменти Андхра-Прадеш ва Одиша штатлари учун огоҳлантириш эълон қилди. Маълумотларга кўра, циклон Андхра-Прадеш штатидаги Висахапатнам порт шаҳридан 260 километр жануби-шарқда жойлашган.
Прогнозларга кўра, циклон қирғоққа етиб келганида шамолнинг барқарор тезлиги соатига 115–125 километрни, кучли шамол эсишидаги тезлиги эса соатига 140 километрни ташкил этиши мумкин.
Андхра-Прадеш штатининг табиий офатларни бошқариш бошқармаси маълумотига кўра, циклон йўналишида 12 миллиондан ортиқ киши яшайди. Душанба куни кечга қадар штатдаги хавфли ҳудудлардан қарийб 50 минг киши бошпаналарга кўчирилган. Жами 400 мингга яқин одамни эвакуация қилиш зарурати мавжуд. Одиша штати расмийлари ҳам 48 минг кишини хавфсиз жойларга кўчиришни режалаштирган.
Циклон сабабли Ҳиндистон шарқида камида 12 та поезд қатнови бекор қилинган, мамлакат жанубий соҳилидаги 53 та йўналишда эса сешанба ва чоршанба кунлари темирйўл қатнови тўхтатилган.
Қўшни Непал расмийлари ҳам эҳтиёт чораларини кўрмоқда. Арнаб циклони пайшанбага ўтар кечадан шанбагача Ҳимолай тоғларида кучли ёмғир, қор бўронлари ва қор кўчкиларини келтириб чиқариши мумкинлиги сабабли сайёҳларга баланд тоғли ҳудудларга бормаслик тавсия этилган.
Эслатиб ўтамиз, август ойида Непалда Ҳимолай тоғлари ҳудудида тўсатдан юз берган сув тошқини оқибатида қарийб 1 500 киши ҳалок бўлган эди.
