«Челси» Абдуқодир Ҳусановнинг трансферини кўриб чиқмоқда — манба
Ҳусановга Англия Премьер-лигасининг яна учта клуби ҳам қизиқиш билдираётгани айтилмоқда.
«Челси» «Манчестер Сити» ҳимоячиси Абдуқодир Ҳусановни қишки трансфер ойнасида ўз сафига қўшиб олиш имкониятини кўриб чиқмоқда. Бу ҳақда Caught Offside хабар берди.
Манбага кўра, Лондон клуби 22 ёшли ўзбекистонлик футболчининг «Манчестер Сити»даги ҳолатини кузатиб бормоқда. Ҳусановнинг жамоа асосий таркибида қанчалик мунтазам ўйнаши «Челси» учун муҳим омиллардан бири бўлади. Ҳусанов жорий мавсумда барча турнирларда 6 та учрашувда майдонга тушди.
Ўзбекистонлик футболчига «Челси»дан ташқари Англия Премьер-лигасининг яна учта клуби ҳам қизиқиш билдираётгани айтилмоқда.
Маълумот учун, Ҳусанов 2025 йил январида «Ланс»дан «Манчестер Сити»га ўтган. У клуб билан шартномасини 2031 йил ёзигача узайтирган.
Transfermarkt маълумотларига кўра, ҳимоячининг трансфер қиймати 50 миллион еврога баҳоланмоқда.
