56 та янги вагон: Тошкент метросида вагонларнинг қарийб 70 фоизи янгиланди
Янги авлод замонавий ҳаракат таркиблари метрополитеннинг 4 та йўналишида ҳаракатланмоқда.
Тошкент метрополитени вагон паркига 2026 йил давомида харид қилиниши режалаштирилган 14 та замонавий ҳаракат таркиби — жами 56 та янги вагон олиб келинди.
Метрополитенда хизматлар сифатини ошириш ва йўловчилар учун қулай шароитлар яратиш мақсадида ҳаракат таркибини янгилашга алоҳида эътибор қаратилмоқда.
Жорий йилда янги ўқув йили бошлангунига қадар режалаштирилган барча 14 та ҳаракат таркиби метрополитен вагон паркига етказиб берилди. Натижада Тошкент метрополитени вагон паркининг қарийб 70 фоизи янгиланди.
Янги авлоддаги замонавий ҳаракат таркиблари метрополитеннинг 4 та йўналишида ҳаракатланмоқда. Бу, ўз навбатида, поездлар қатнови оралиғининг, айниқса, куннинг тиғиз вақтларида сезиларли қисқаришига имкон берди.
Ҳозирда тиғиз вақтларда поездлар:
Чилонзор йўналишида — 1,5–2 дақиқалик;
Ўзбекистон йўналишида — 3 дақиқалик;
Юнусобод йўналишида — 4 дақиқалик;
Ер усти ҳалқа йўналишида — 7–8 дақиқалик интервал билан ҳаракатланмоқда.
