Иш жойидаги бахтсиз ҳодисалар: қайси ҳолатлар текширилади?

 

Ҳукуматнинг 505-сонли қарори билан “Меҳнат фаолияти билан боғлиқ бахтсиз ҳодисалар тўғрисида хабар бериш, уларни текшириш ва ҳисобга олиш тартиби ҳақида”ги низом тасдиқланди.

 

Янги тартибга кўра, табиий ўлим, ўз жонига қасд қилиш, жабрланувчининг ўз соғлиғига қасддан шикаст етказиши, шунингдек, жиноят содир этиш вақтида жароҳатланиш ҳолатлари текширилмайди ва ҳисобга олинмайди.

 

Бахтсиз ҳодиса юз берганда иш берувчи жабрланувчига зудлик билан шифокоргача бўлган биринчи ёрдамни кўрсатиши, зарур ҳолларда уни тиббиёт муассасасига етказишни ташкил этиши керак.

 

Шунингдек, тегишли орган ва ташкилотлар ҳамда жабрланувчининг яқинларини хабардор қилиши лозим.

 

Бахтсиз ҳодиса ҳақида жабрланувчи ёки гувоҳ дарҳол бўлинма раҳбарига хабар бериши керак.

 

Бўлинма раҳбари эса жабрланувчига биринчи ёрдам кўрсатиш ва уни тиббиёт муассасасига етказишни ташкил этиши, махсус текширув комиссияси иш бошлагунига қадар ҳодиса жойидаги вазият ва жиҳозларни ҳодиса содир бўлган пайтдаги ҳолатда сақлаши лозим.

 

Бундан ташқари, бўлинма раҳбари бахтсиз ҳодиса ҳақида иш берувчи ҳамда касаба уюшмаси ёки ходимларнинг бошқа вакиллик органига дарҳол хабар бериши шарт.

 

Қуйидаги бахтсиз ҳодисалар махсус текширилади:

— бир вақтнинг ўзида икки ёки ундан ортиқ ходим билан юз берган гуруҳли бахтсиз ҳодисалар — жароҳат оғирлигидан қатъи назар;

— оқибатида ўртача оғир ёки оғир даражадаги зарар етган бахтсиз ҳодисалар;

— ўлим билан якунланган бахтсиз ҳодисалар.