95 кг гашиш аниқланди: уч нафар шахс ушланди
Гашиш Қибрай туманидаги дала майдонида дарахтлар орасига яширилган қопларда бўлган.
Тошкент вилоятининг Қибрай туманида ўтказилган тезкор тадбир давомида салкам 95 килограмм гашиш гиёҳвандлик воситаси ноқонуний муомаладан олинди. Ҳолат юзасидан уч нафар шахс қўлга олинган.
Божхона қўмитаси ва ДХХ ходимлари ҳамкорлигида ўтказилган тадбирда дала майдонидаги дарахтлар орасига яширилган 4 дона хўжалик қопи аниқланган. Қоплар ичидан 109 дона ўрам топилган.
Марказий божхона лабораторияси хулосасига кўра, ўрамлардаги модда салкам 95 килограмм гашиш бўлиб чиққан.
Шундан сўнг гиёҳвандлик воситаларини олиб кетиш учун келадиган шахсларни аниқлаш мақсадида ҳудуд бир неча кун давомида кузатув остида бўлган. Орадан 8 кун ўтиб, моддаларни олиб кетиш учун келган икки нафар фуқаро қўлга олинган.
Тергов давомида гиёҳвандлик воситаларини яширилган жойдан олиб кетиш ҳақида топшириқ берган шахс ҳам аниқланиб, қўлга олинган. У аввал бензин контрабандаси билан шуғуллангани сабабли Божхона қўмитаси томонидан қўзғатилган жиноят иши доирасида жиноий жавобгарликка тортилган шахс экани аниқланган.
Ҳолат юзасидан Божхона қўмитасининг Суриштирув ва маъмурий амалиёт бошқармаси томонидан жиноят иши қўзғатилиб, тергов органига юборилган.
Маълумотга кўра, 95 килограммга яқин гашиш қарийб 700 минг дозага тенг. Унинг қора бозордаги қиймати истеъмолчига етиб боргунига қадар 10 миллион АҚШ долларидан ошиши мумкинлиги ҳисоб-китоб қилинган.
