“Мен уларга ҳеч нарса таклиф қилганим йўқ”: Трамп Эрон санкцияларини юмшатиш таклифини рад этди
АҚШ президенти музлатилган активларни очиш таклифи берилгани ҳақидаги хабарларни “ёлғон” деб атади.
Дональд Трамп Эроннинг ядровий дастури бўйича келишувга эришиш эвазига Теҳронга қарши санкцияларни юмшатиш ёки музлатилган маблағларини очиш таклифи берилгани ҳақидаги хабарларни рад этди.
Трамп бу ҳақда Truth Social’даги саҳифасида маълум қилди. У Axios нашрининг АҚШ Эрон ядровий дастури бўйича аниқ қадамлар ташлаши эвазига санкцияларни юмшатиш ва музлатилган маблағларни очишга тайёр экани ҳақидаги хабарини ёлғон деб атади.
Аввалроқ Axios ва CNN АҚШ маъмуриятидаги манбаларга таяниб, Трамп Теҳрон ядровий масалада «аниқ» қадамлар ташласа, санкцияларни юмшатиш ҳамда музлатилган маблағларни чиқаришга рози бўлиши мумкинлиги ҳақида хабар берган эди.
Шу билан бирга, Reuters АҚШ маъмурияти Эрон ва Ироқ ўртасида диний зиёратчилар ташувини амалга оширувчи рейсларга нисбатан чекланган санкция истисносини беришни режалаштираётганини хабар қилди. Истисно Iraqi Airways авиакомпаниясининг Эрон ва Нажаф шаҳри ўртасидаги рейсларига тааллуқли бўлиши кутилмоқда.
Эрон эса аввалроқ АҚШнинг денгиз блокадаси ва нефть экспортига қўйилган чекловларни бекор қилиш эвазига Ҳурмуз бўғозини етти кун ичида очишни таклиф қилган эди. Трамп 27 сентябрь куни бу таклифни рад этиб, уни мақбул эмас деб атаган.
