5 минг долларлик гашиш: тезкор тадбирларда 4 киши қўлга олинди

 

Фарғона ва Наманган вилоятларида ДХХ, Ички ишлар ва Божхона органлари ҳамкорлигида ўтказилган тезкор тадбирларда жами 2 кг 643 грамм гашиш моддаси мусодара қилинди.

 

Фарғона вилоятида ўтказилган тадбир давомида «Фарғона–Тошкент» йўналишида ҳаракатланган «Собалт» русумли автомобиль Поп туманидаги «Наманган» ЙПХ масканида тўхтатилиб, кўздан кечирилган. Текширувда Чирчиқ шаҳрида яшовчи, 1995 йилда туғилган фуқаро бошқарувидаги автомобиль юкхонасига яширилган 1 кг гашиш моддаси аниқланган.

 

Наманган вилоятининг Чуст туманида ўтказилган бошқа тадбирда эса «ВАЗ-2103» русумли автомобиль текширилган. Унда Янги Наманган туманида яшовчи, 1987 йилда туғилган, муқаддам судланган шахсга тегишли автомобиль салонидан 995 грамм гашиш моддаси топилган.

 

Шунингдек, Наманган шаҳрида яшовчи, 1975 йилда туғилган фуқаронинг хонадони холислар иштирокида кўздан кечирилганда, ертўласидан 648 грамм гашиш моддаси ашёвий далил сифатида олинган.

 

Терговга кўра, ушбу фуқаро гиёҳвандлик воситасини Янги Наманган туманида яшовчи, 1972 йилда туғилган танишидан 5 минг АҚШ долларига сотиб олган. Мазкур шахс ҳам процессуал тартибда ушланган.

 

Қайд этилишича, ҳолатлар юзасидан жиноят ишлари қўзғатилиб, ҳозирда тергов ҳаракатлари олиб борилмоқда.