Сербия президенти истеъфога чиқди: Вучич энди бош вазирликка даъвогарлик қилади
Унинг президентлик муддати 2027 йилда якунланиши керак эди.
Сербия президенти Александр Вучич 27 сентябрь куни президентлик лавозимидан истеъфога чиқди. У 25 октябрда бўлиб ўтадиган муддатидан олдинги парламент сайловида иштирок этиб, бош вазир лавозимига номзод бўлишини маълум қилган.
Вучичнинг иккинчи президентлик муддати 2027 йил ўрталарида якунланиши керак эди. Сербия Конституциясига кўра, бир шахс президент лавозимига икки мартадан ортиқ сайланиши мумкин эмас. У 2017 йилда президент этиб сайланган ва 2022 йилда иккинчи муддатга қайта сайланган.
Reuters хабарига кўра, Вучичнинг истеъфоси 25 октябрга белгиланган муддатидан олдинги парламент сайловлари арафасида юз берди. У ҳукмрон Сербия Прогрессив партияси (SNS) янги ҳукуматни шакллантирган тақдирда бош вазир лавозимига тайинланиши мумкин. Унинг истеъфоси эса навбатдан ташқари президентлик сайловларига йўл очади.
Сентябрь ойининг бошида Вучич парламентни тарқатиб юбориш ва 25 октябрда муддатидан олдинги сайлов ўтказилишини эълон қилган эди. Ҳукмрон SNS эса Вучични сайловда “Бирлашган Сербия” рўйхатининг етакчиси сифатида кўрсатган.
Президентлик лавозими вақтинча парламент спикери Ана Брнабичга ўтади.
Вучичнинг истеъфоси Сербияда давом этаётган сиёсий норозиликлар фонида юз берган. Мамлакатда 2024 йил ноябрида Нови-Сад шаҳридаги темирйўл вокзали томининг қулаб тушиши ва 16 кишининг ҳалок бўлишидан кейин талабалар бошчилигидаги намойишлар бошланган. Намойишчилар ҳукуматдан коррупцияга оид масалалар бўйича жавобгарлик ва сиёсий ўзгаришларни талаб қилган. Вучич эса намойишчилар билдирган айбловларни рад этиб келган.
